Home Contact Phone
background

Fəaliyyət

Azərbaycan Respublikasının Prezidenti cənab İlham Əliyevin sədrliyi ilə Nazirlər Kabinetinin 2017-ci ilin birinci rübünün sosial-iqtisadi inkişafının yekunlarına və qarşıda duran vəzifələr barədə Şabran rayon İcra Hakimiyyəti başçısının

 

HESABATI

 

     Azərbaycan Respublikasının Prezidenti cənab İlham Əliyevin düzgün müəyyənləşdirdiyi sosial-iqtisadi inkişaf strategiyası əsasında apardığı çevik və praqmatik siyasət ölkəmizin inkişaf edərək dünya dövlətləri arasında layiqli yer tutmasını təmin etmişdir. Cənab Prezidentin sədrliyi ilə Nazirlər Kabinetinin cari ilin birinci rübünün yekunlarına və qarşıda duran vəzifələrə həsr olunan iclasında da bu barədə ətraflı söhbət getmiş, ölkə həyatında diqqətçəkən digər məsələlərdən bəhs edilmişdir.
     İlin əvvəlindən ölkə başçısı beynəlxalq fəaliyyətin, aparılan daxili və xarici siyasətin çox uğurlu olduğunu qeyd etmişdir.
     Cənab Prezident müşavirədəki nitqində birinci rübün nəticələrini yüksək qiymətləndirərək qeyd etmişdir ki, “Azərbaycan bütün sahələrdə çox sürətlə inkişaf edib, bizim beynəlxalq mövqelərimiz möhkəmlənib, ölkə daxilində proseslər müsbət istiqamətdə gedir, iqtisadi inkişaf təmin edilir, bütün sosial məsələlər öz həllini tapır.”
     Ötən üç ayda respublikamız iqtisadi inkişafın keyfiyyətcə yeni mərhələsinə qədəm qoymuşdur. Dövlətimizin başçısı müşavirədə diqqətə çatdırmışdır ki, hesabat dövründə ölkəmiz uğurla inkişaf edib, bütün proqnozlar yerinə yetirilib. İqtisadiyyatın ayrı-ayrı sahələrində müsbət nəticələr nəzərə çarpıb. Qeyri-neft sektoru 2.4 faiz, kənd təsərrüfatı 3.5 faiz artıb, qeyri-neft sənayesinin artımı 2 faiz səviyyəsində olub. Bitkiçilikdə artım 20 faiz təşkil edib. Bu ilin 3 ayında ticarət dövriyyəsi 15 faiz, ixrac potensialı 50 faiz artmış, idaxl isə 17 faiz azalmışdır. Bu isə onu göstərir ki, görülən işlər, həyata keçirilən ciddi islahatlar, investisiyalar öz uğurlu nəticəsini verib.
     Birinci rübdə ölkəmizin valyuta ehtiyatları 1 milyard dollar səviyyəsində artıb. Hazırda Azərbaycanın valyuta ehtiyatları 38.5 milyard dollar təşkil edir. İş yerlərinin açılması da diqqət mərkəzində saxlanılıb. Birinci rübdə 85 min yeni iş yeri yaradılıb. Onlardan 70 mini daimi iş yeri təşkil edib.
Bu ilin birinci rübündə dövlət başçısının Avropa Komissiyasına səfəri, eyni zamanda 7 dövlət və hökumət başçılarının Azərbaycana gəlişi, ölkəmizdə 5-ci Qlobal Forumun keçirilməsi beynəlxalq təmaslarımızın çoxşaxəli olduğunu bir daha sübut edir.
     Ermənistan-Azərbaycan-Dağlıq Qarabağ münaqişəsinin daim diqqət mərkəzində olduğunu vurğulayan cənab Prezident, danışıqlar prosesində mövqeyimizdə heç bir dəyişikliyin olmadığını və bu münaqişənin ölkəmizin ərazi bütövlüyü çərçivəsində öz həllini tapacağını bildirmişdir. Məhz Cocuq Mərcanlı kəndinin işğaldan azad olunaraq bərpasına başlanılması və orada yeni evlər, məktəb, uşaq bağçası, məscid, yeni yol və s. bu kimi infrastruktur layihələrin salınması dövlət-xalq siyasətinin vəhdətini təşkil edir.
     Ötən illərdə qlobal maliyyə iqtisadi böhranın ciddi təsirləri, neftin qiymətinin 3-4 dəfə aşağı düşməsinə baxmayaraq, dövlət başçısının apardığı ciddi islahatlar, qəbul edilmiş inkişaf planları, operativ tədbirlər valyuta ehtiyatlarımızın artmasına, qeyri-neft sektorunun inkişafına nail ola bilmişik.
     2017-ci ilin birinci rübündə rayonumuzda da iqtisadiyyatın bütün sahələrində müsbət irəliləyiş nəzərə çarpır. Ötən 3 ayda məhsul buraxılışının həcmi 52.2 milyon manat, keçən ilin müvafiq dövründən 79 faiz çox, sənaye məhsulu istehsalı 6.6 milyon manat, ötən ilin müvafiq dövrü ilə müqayisədə 1.6 faiz çox olmuşdur. Kənd təsərrüfatı məhsulları istehsalı 30 milyon manat və ya 82 faiz artıq olmuşdur.
     Son 3 ayda 8.8 min ton un, 14 min dekalitr şərab istehsal edilmiş, 28 kv.m xalça toxunmuşdur. Rayon üzrə çalışanların orta aylıq əmək haqqı 318 manat olmuşdur.
     2017-ci ilin birinci rübündə 850 iş yeri açılmışdır ki, onun da 842-si daimi iş yerləridir.
     Azərbaycan Respublikasının Prezidenti cənab İlham Əliyev ölkə əhalisinin məşğulluq səviyyəsinin artırılması və yeni iş yerlərinin açılması tapşırıqlarına uyğun olaraq rüb ərzində rayonda 253 iş yeri açılmışdır.
     Sahibkarlığa Kömək Milli Fondu tərəfindən bu ilin 3 ayı ərzində 4 investisiya layihəsinə 10.4 milyon manat kredit verilmişdir. Bu layihələrin icrasının nəticəsində 91 yeni iş yeri yaradılmışdır.
     Sahibkarlığın inkişafı ilə bağlı rayonda tədbirlər davam edir. Yanvar-mart aylarında sahibkarlıq subyektlərinin sayı 669 vahid artaraq 5583 nəfərə çatmışdır. Onlardan 149-u hüquqi və 5434 nəfəri fiziki şəxslərdir. Birinci rübdə 2 müəssisə - “Çıraqqala Aqro” MMC, “Corporade” (1 kənd təsərrüfatı, 1 xidmət) yeni yaranmış, 1 müəssisə - “Nurston” fəaliyyətini yenidən bərpa etmişdir.
     Qeyri-neft sektorunun əsas sahəsi kimi kənd təsərrüfatı bu gün Azərbaycanın sosial-iqtisadi inkişafında, o cümlədən regionlarda yaşayan əhalinin məşğulluğunun təminatında müstəsna rol oynayır. Dünya enerji bazarında yaşanan məlum proseslərin ölkəmizin iqtisadiyyatına göstərdiyi təsir nəicəsində yaranan problemlərin dəf edilməsində də aqrar sektorun əhəmiyyəti az deyil.
     Təsadüfi deyil ki, indi Azərbaycanda kənd təsərrüfatının inkişaf etdirilməsi bir tərəfdən ölkəmizin ərzaq təhlükəsizliyini təmin edir, digər tərəfdən onun əməktutumlu sahələrinin genişlənməsi nəticəsində daha çox insan özünə iş yeri tapır, güzəranını yaxşılaşdırır.
     İlin birinci rübündə rayonda kənd təsərrüfatının dinamikası müşahidə olunmuşdur.
     Rayonun təsərrüfatlarında yaz tarla işləri sürətlə davam edir. Belə ki, 2017-ci ilin məhsulu üçün rayonda 208 hektar sahədə yazlıq bitkilər əkilmişdir. 114 hektar kartof, 27 hektar sahədə isə tərəvəz əkilmişdir. Kəndlərdə tərəvəz əkini üçün şum işləri aparılır. Bu günə qədər 350 hektar sahədə tərəvəz əkini üçün şum görülmüşdür. Bu il 700 hektar sahədə tərəvəz əkilməsi gözlənilir ki, bu da keçən ildən 60 hektar çox olacaqdır.
     Ötən illərdən fərqli olaraq rayonda dənli-paxlalı bitkilərin: noxud, mərci yetişdirilməsinə maraq artmışdır. İndiyədək rayonda keçən ildən 9 dəfə çox, yəni 28 hektar sahədə noxud bitkisi əkilmişdir. Əkin işləri davam edir.
     Biz ilin yekunlarını müzakirə edərkən 100 hektar sahədə şəkər çuğundurunun əkilməsini əsas hədəflərimizdən biir olmuşdur. Hal-hazırda Çuxurəzəmi kəndi ərazisində 5 hektar sahədə şəkər çuğundurunun əkilməsi üçün şum işləri aparılmışdır. Rayon Kənd Təsərrüfatı idarəsi fermerlərlə bu işi əlaqələndirməli və nəzarəti artırmalıdır.
     Ötən 3 ayda meyvə bağlarının salınması işlərində də fermerlər fəallıq göstərmişdir. Belə ki, 228 hektar sahədə yeni meyvə bağları və 4 hektar sahədə yeni üzüm bağları salınmışdır. Yeni salınmış meyvə bağlarının 83 hektarı fındıq bağlarıdır.
     Rayonun Gəndov kəndi ərazisində 7 hektar sahədə “Turaz” Məhdud Məsuliyyətli Cəmiyyəti tərəfindən damla üsulu ilə suvarılan çiyələk plantasiyası salınmışdır.
     Birinci rübdə rayon fermerlərinə güzəştli şərtlərlə 394 ton mineral gübrə satılmışdır. Fermerlər tərəfindən lizinq yolu ilə 18 ədəd texnika (9 traktor, 2 kotan) alınmışdır.
     2017-ci ilin birinci rübü üçün rayon ərazisində şəxsi və kənd təsərrüfatı müəssisələrində saxlanılan iribuynuzlu və xırdabuynuzlu heyvanların sayı 2 faiz artmış, quşların sayı isə 1 milyon başı ötmüşdür. Üç ayda 214 baş mal-qarada süni mayalanma aparılmışdır. Süni mayalanma ilə 61 baş cins sağlam buzov alınmışdır.
     Bu ilin birinci rübündə 7007 ton ət, 3872 ton süd, 1.2 milyon ədəd yumurta istehsal edilmişdir.
     Cənab Prezidentin tapşırığına əsasən “Samur-Abşeron suvarma sisteminin yenidən qurulması layihəsi” çərçivəsində Şabran rayonunda yeni suvarılacaq 14922 hektar torpaq sahəsində kompleks meliorasiya işləri davam etdirilmişdir. Mənbəyini Taxtakörpü kanalından götürən magistral suvarma borusunun bu günə qədər artıq 14 km hissəsi çəkilib qurtarmışdır. Hal-hazırda işlər davam edir.
     Rayonun mövcud suvarılan torpaqlarının da su təminatının yaxşılaşdırılması üçün 70 km suvarma arxı, 6 km kollektor lildən təmizlənmiş, 20 ədəd hidrotexniki qurğu təmir olunmuşdur.
     Rayonda ekoloji tədbirlər davam etmişdir. Son 3 ay ərzində rayonda 5000 ədəd ağac və gül kolları əkilmişdir. Bu iş davam edir.
Meşələrin Mühafizəsi və Bərpası idarəsi tərəfindən də 33 hektar  sahədə meşə ağacları əkilmişdir.
     İDEA İctimai Birliyinin təşəbbüsü ilə təbiətin mühafizəsi, ağacların və təbii sərvətlərin qorunması məqsədilə kağız, karton və plastik tullantıların yığılması və təkrar emala verilməsinə nəzarətin gücləndirilməsi üçün rayon İcra Hakimiyyəti başçısının müvafiq Sərəncamı ilə qərargah yaradılmış və bu istiqamətdə müvafiq tədbirlər görülməlidir.
     2017-ci ilin birinci rübündə rayon üzrə dövlət büdcəsinin gəlirlərinin icrası 702.5 min manata qarşı 874.1 min manat, yəni, 124.4 faiz yerinə yetirilmişdir. Yerli büdcənin xərcləri isə 1.1 milyon manat proqnoza qarşı 703.4 min manat və ya 69.2 faiz icra edilmişdir.
     Cənab Prezident iclasdakı nitqində ölkədə infrastruktur layihələrin tikintisinin davam edəcəyini bildirmişdir.
     Şabran rayonunda da bu layihələrin icrası ilə bağlı işlər davam etmişdir.
     Şabran Elektrik Şəbəkəsində yenidənqurma işləri davam etmişdir. Rayonun Əmirxanlı kəndində 21 ədəd, Qələgah kəndində 15 ədəd 0.4 kv-luq yeni elektrik dirəkləri quraşdırılmışdır.
     Sərf olunan elektrik enerjisinin dəyəri ümumi istehlakçılar tərəfindən 83 faiz, əhali tərəfindən 80 faiz ödənilmişdir.
     Təbii qaz təchizatının yaxşılaşdırılması ilə əlaqədar tədbirlər davam edir. Şəhərin M.Ə.Rəsulzadə küçəsində və rayonun Uzunboyad, Gəndov, Şahnəzərli, Sincanboyad kəndlərində müxtəlif diametrli korroziyaya uğramış qaz xətləri yenisi ilə əvəzlənmişdir.
     Təbii qazın dəyəri ümumi istehlakçılar tərəfindən 94 faiz, əhali tərəfindən 97 faiz ödənilmişdir.
     Şabran şəhərinin içməli su və kanalizasiya şəbəkəsinin yenidən qurulması layihəsi davam edir. Bu günə qədər 6453 abonentə su xətti çəkilmişdir.
     İçməli suyun dəyəri ümumi istehlakçılar tərəfindən 86 faiz, əhali tərəfindən 87 faiz ödənilmişdir.
     Rayonda rabitə xidmətinin yaxşılaşdırılması istiqamətində tədbirlər davam edir. Rayonun Təzəkənd kəndində 1600 metr TPP tipli kabel xətti buraxılmaqla 10 ədəd telefon və internet xətti çəkilmişdir.
“     2014-2018-ci illər regionların sosial-iqtisadi inkişafı Dövlət Proqramı”na uyğun olaraq Şabran-Çayqaraqaşlı-Udulu yolunun tikintisinə başlanılmış, ilkin mərhələdə Udulu və Çayqaraqaşlı istiqamətində ilk çala təmiri və bərpa işləri aparılır.
     2017-ci ilin birinci rübündə rayonda tikinti, abadlıq, quruculuq işləri davam etmişdir. H.Əliyev prospektində Uşaq, Gənclər İstirahət Mərkəzinin tikintisi, Şəhidlər Xiyabanında soyqırım abidəsinin və Qəhrəmanlar Seyrəngahının, şəhərin cənub tərəfində parkın tikintisi, çoxmənzilli binaların əsaslı təmir işləri davam etmişdir.
     Şəhərin H.Əliyev prospekti və Q.Qasımov küçəsində yerləşən beşmərtəbəli 6 bloklu və 6 ədəd 2 bloklu, 1 ədəd 1 bloklu yaşayış binalarının pilləkən qəfəsləri təmir edilmiş, girişlərdə yeni seyf qapılar quraşdırılmışdır. Hal-hazırda iş davam edir.
     Şəhərin H.Əliyev prospektində, Z.Əliyeva və M.Ə.Rəsulzadə küçələrində də yenidənqurma işləri aparılır.
     Belə ki, şəhərin küçələrinə 520 metr məsafədə bardür qoyulmuş, 920 kv.m dekorativ üzlük daş döşənmiş, 184 kv.m üzlük aqlay vurulmuşdur.
      Cənab Prezident müşavirədəki nitqində təhsil, səhiyyə və mədəniyyət müəssisələrinin maddi texniki bazasının yaxşılaşdırılması, infrastruktur layihələrin icrasının növbəti illərdə də  davam edəcəyini bildirmişdir.
      Dövlət investisiya vəsaiti hesabına rayon İcra Hakimiyyətinin sifarişi ilə 80 şagird yerlik Taxtalar kənd ümumi orta məktəbində son tamamlama işləri aparılır. Rayonun Hacıqaraqaşlı kəndində isə yeni modul tipli məktəbin tikintisinə başlanılmışdır.
      Azərbaycan Respublikası Prezidentinin müvafiq tapşırığına əsasən 2017-ci il mart ayının 23-dən 26-na qədər məktəblərin IX, X, XI sinif şagirdləri üçün Azərbaycanın qədim tarixinin, zəngin mədəniyyətinin, müstəqillik illərində sürətli sosial-iqtisadi inkişafının əyani şəkildə öyrənilməsi məqsədilə “Ölkəmizi tanıyaq” şüarı altında tur-aksiya keçirilmiş, bu aksiyada iştirak edən 40 nəfər şagird respublikanın cənub bölgəsinə səfər etməklə Lənkəran, Astara və Masallı rayonlarında olmuş, həmin ərazilərin təbiəti, tarixi yerləri və mədəniyyəti ilə yaxından tanış olmuşlar.
     Ölkə başçısı cənab İlham Əliyev müşavirədəki nitqində turizmin inkişafının vacibliyini bir daha diqqətə çatdırdı, müvafiq tapşırıqlar verdi. “Qalaaltı Hotel SPA” mərkəzinin adını xüsusilə qeyd edən cənab Prezident oradakı xidmətin yüksək səviyyədə təşkil olunduğunu bildirmişdir.
      2017-ci ilin 3 ayı ərzində “Qalaaltı Hotel SPA” mərkəzinə 10113 nəfər turist (9671 nəfər yerli, 442 nəfər xarici) axını olmuşdur.
      Hazırda “Şabran şəhəri” Tarix Qoruğunun Aygünlü kəndi ərazisində yerləşən “Çaqqallıq təpə” abidəsində arxeoloji qazıntılar davam edir. Qazıntı işləri zamanı həmin ərazidən iki yeni abidə aşkarlanmışdır ki, bunların da tarixi beş min il bundan əvvələ təsadüf edir.
      Azərbaycan Respublikasının Prezidenti cənab İlham Əliyevin tapşırığı ilə 2017-ci ildə də fevral ayının 15-dən may ayının 2-dək 18 yaşdan yuxarı əhalinin dispanserizasiyası və tibbi müayinədən keçirilməsi təşkil olunmuş, rayon üzrə 69 yaşayış məntəqəsini əhatə etməklə indiyə qədər 36073 nəfər tibbi müayinədən keçmişdir. Hazırda tibbi müayinə davam etməkdədir.
      Prezident cənab İlham Əliyev müşavirədəki nitqində qeyd etdiyi kimi korrupsiya və rüşvətxorluğa qarşı mübarizə davam etdirilməlidir. Bu sahədə inzibati cəza tədbirləri ilə yanaşı institutisional tədbirlər də görülməlidir. Korrupsiya və rüşvətxorluğa qarşı son illər ərzində aparılan institutisional islahatlar içərisində “ASAN xidmət” ön plandadır. “ASAN xidmət” həm yenilik, həm rahatlıq gətirmiş, həm də korrupsiya və rüşvətxorluğa qarşı mübarizədə çox ciddi dönüş yaratmışdır. Artıq rayonumuzda da iki ildir ki, “ASAN xidmət”-in səyyar briqadası Şabran rayonunun sakinlərinə xidmət edir. “ASAN xidmət”-in səyyar briqadası aprel ayında rayonumuzun sakinlərinə dördüncü dəfədir ki, yüksək xidmət göstərmişdir.
      Cənab Prezident müşavirədəki nitqində qeyd etdiyi kimi, may ayında ölkəmizdə IV İslam Həmrəyliyi Oyunları keçiriləcəkdir. Sevindirici haldır ki, bu oyunlarda rayonumuzun da bir idmançısı Uşaq, Gənclər İdman Məktəbinin məşqçi müəllimi Məmmədi Salamov zorxana və pəhləvan güləşi üzrə keçiriləcək yarışlarda 70 kq çəki dərəcəsində ölkəmizi təmsil edəcəkdir.
     “Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramı”nın 4-cü ilidir. Dövlət Proqramında Şabran rayonu üçün nəzərdə tutulmuş 17 bənddən ibarət tədbirlərin icrası rayonda uğurla həyata keçirilir.
2017-ci ilin birinci rübündə rayon İcra Hakimiyyətinin başçısı yanında Şuranın 6 iclası keçirilmişdir. Rayonun sosial-iqtisadi, mədəni həyatı ilə bağlı 6 məsələ araşdırılmış, müzakirə edilmişdir.
      İcra Hakimiyyəti başçısının ünvanına vətəndaşlar tərəfindən 128 müraciət daxil olmuş və bütün müraciətlər icra müddətinə uyğun olaraq həll olunmuşdur.
2017-ci ilin birinci rübündə rayon İcra Hakimiyyətinin başçısı  9 yaşayış məntəqəsində səyyar qəbul keçirmişdir. Bu səyyar qəbullarda iştirak edən 202 nəfər vətəndaşdan 19 nəfəri müxtəlif problemlərin olduğunu qeyd etmişdir. Bu müraciətlərin əksəriyyəti yolların yararsız vəziyyətdə olması, kəndlərdə yol və küçələrin təmiri, su təchizatının yaxşılaşdırılmasından ibarət olmuşdur. Problemlərin həll olunması üçün aidiyyatı təşkilatlara tapşırıqlar verilmişdir.